ALMON LIIF, Carminolic Tappola. Di almon liif fa wen yu hav “swing hed”. Wen yu hed siim go raun, an somtaim yu kyaan briid. Yu tai it an wen yu fiil di hed swing an somtain yu kyaan briid. Maibi di presha hai.

ARINJ LIIF, Citrus Aurantium. Speshali di bit-n-swiit arinj. Laik di almon liif, dem sei ih no let yo presha guo op. Dei sei yu tek dat tu kiip yo blod normal… Yu tai ih an yu hed, ar yu drink di arinj tii, tu.

KASHU, Anacardium Occidentale. Yu bail ih fa di presha. Wi iit ih laik so, an wi mek “dulce” wih it. Dat iz hir a lat, a lat in di mountin. Yu kyan gou an pik op eni bokit.

WAIL BAAZLI, Ocimun Sanctum, gud fa narvz, gud fa di presha an di narvz. Na di wait baazli. Ih fi kuuk.